sahAdareNa yovalaksha pArijaatamaalayA
galasthalI vibhuuShayA dhvaniM vinaiva bhAShate .
maheshapuNyayoShito manoj~na hAsa eSha me
vibhUtaye prakalpatAM vidhUtaye cha pApmanAm.h  .. 1

nirantarashrite sadA kR^ipArasa pravAhinI
vilAsinI tanurvibhoH pumAkR^itervimohinI .
sudhAtara~Nga kalpa hAsa bhAsurAnanA shivA
padAbjalambino dhunotu pApmanaH phalaM mama .. 2

karotiyA bhibhartiyA nihantiyA jagattrayam.h
samantato vibhAtiyA na drushyate kvachichcha yA .
atIvaguptarUpiNI gurUpadeshamantarA
na shakyate budhaischa bodhdhumandhakArisundarI .. 3

mahAndhakAra bandhurasya bhUtasa~nchayasya yA
vinidritasya sarvabIjadhAmni maunamudrite .
samastato vijR^imbhaNAya bhAsanAya chAbhavan.h
mahadvidhAya cheShTitaM mameyamiShTa devatA .. 4

mahesha garbhataH samasta bhUta bIja koshataH
kirantyasheSha vishvamapyapAra divya vaibhavA .
vichitra cheShTa yAdyayA vidhUta-nAthanidrayA
jagannutA jayatyasAvanAdishaktiradbhutA .. 5
 
bhavaM bhaNanti tAntrikAstvadAshrayaM tamavyayaM
samAmanantivaidikAHsadarchite ! sadAhvayam.h .
na kashchidarthabheda etadAkhyayordvayorbhave-
dbhideyamAdimaM padaM pumAnparaM napuMsakam.h .. 6

sachedbhavo.abhidhAnato, bhavAnyasi tvamavyaye!
samIryate sa sadyadi tva mamba! bhaNyase satI .
sate.asti bhAvatAnashakti rupiNI hi vidyase
navedmi kAlike! kathaM sato satashcha bhidyase .. 7

jagadvidhAna kAryataH purA surAsura stute!
tva mamba! jIvitaM bhavasya bhAvamUla vAdinAm .
vikalpa varjitA matiH-prabodha-mUlavAdinAM
raso.anapeksha uttamaH pramoda-mUlavAdinAm.h .. 8

bavatyasAvato bhavAnyanAdiranta varjitA
jagantimAti nityamorasau tadabhyudhayyumA .
rasAtmikoshyate.akhilairasau tataH shivocyate
paraivamIshitushchitistridhA yudhairudIryate .. 9

chitiH paraina kAmanA rasena kenachidyutA
chitiH paraina sarvadA.apyanastyajasyatu kriyA .
chitiH paraiva gocharAvabhAsikA matiH smR^itA
tridhaiva manyathA chiteshcirantanai rudIryate.. 10

chikIrShata prabhaujvalattvadIya kIla santate-
rvikIrNa dhUmajAlametadambara sthalaM tatam.h .
visR^ishTitaH purA.asi yA shiva-prabhutva rUpinI
pR^ithak.h prabhushcha lakshitA.asi sA savitri! pushkare .. 11

punarvipAkato ghanI-bhavadbhirakshigocharai-
statastataH samujvalaiH svasUkshma-reNu-golakaiH .
ajANDa-vR^iksha-koTikandabR^indavadvyadhAH purA
mahesha-dR^ishTimayyume.amba maNDalAni bhAsvatAm.h .. 12

tapo.agni dhUmajAlake bhavanti taijasANavo
bhavanti jIvanANavo, bhavanti pArdhivANavaH .
krameNa tadvisR^iShTirIsha-shaktipAka-vaibhave
sahasra-bhAnu-manDalaM tu gocharAdigR^ihyatAm .. 13

mayUkha-mAli maNDale nidhAya pAdamugrayA
mayUkha-shakti rUpayA tvayA.amba! cheShTamAnayA .
khakoshataH samAhR^itaiH punastrirUpa reNubhiH
vyathAyi ma~NgalAdibhiH sahagrahairiyaM mahI .. 14

visarjanena bhUpasA.api devyatR^iptaye yatA
vicheShTitaM vilakshaNaM punarvyadhIyatatvayA .
ihantare vasundharA - mayUkhamAli bimbayo-
ramuShya karmaNaH savitri! chandramanDalaM phalam.h .. 15

vadhU - pumAkR^itau bhabhUvathuryuvAMshive
tvamIshvarashcha lIlayA vihartumatra viShTape .
aho! prabhuM nabhastanuM tvadIya garbha-sambhavAd.h-
bhaNanti kAli! tatra chitra bhAShaNAstvadAtmajam .. 16

pumAnatho sabimbito hiraNmayo divAkare
dhiyA.api naiva kevalaM hiraNmayena varShmaNA .
idaM tu kAryarUpamanyaduchyate budhaiH prabho-
rihantare nR^iNAM punarvapustadamba bimbitam.h .. 17

svayaM cha kA~nchana prakAsha-varShmaNA prabhAkare
tathAntare.anR^iNAM cha tasya bimbitAsi sannidhau .
rasasya devatAsi devi puShkare divAkare
mayUkha devatA.asi bhogadevatAsi dehiShu .. 18

visarjanena bhUyasA nabhasyamutra bhAskare
mahIShu chAmbike yuvAM vidhAya dehino bahUn.h .
kshiteH sudhAkaraMgatAn.h pitR^In.h vinetumavyaye
tanU cha tatra babhrathuH prapa~ncha-rAg~ni! mAyayA! .. 19

sabho.antare hiraNmayaM vibhuM prachakShate haram.h
dineshabimba-bimbitaM bhaNanti pa~NkajAsanam.h .
ihAsmadantarAlayaM vadanti viShNumachyutam.h
savitri! janmanAmiyaM "trimUrti" vAdi dhoraNi .. 20

nabho.antare prachakshate hiraNmayA~NgamIshvaram.h
dineshabimba-pUruShaM hiraNyagarbhamAkhyayA .
virAjamAnamaksharaM virAjamantare nR^iNAM
savitri! tatvavedinAmiyaMtu nAmakalpanA .. 21

hiraNmayA~Ngamambare vadanti somamambike
divAkarasya maNDale tu bimbitaM purandaram .
sharIriNAmihAntare.agni-mAlapanti bhAsuram
chirantanokti darshinAmiyaM shive praNALikA .. 22

saroruhAksha vAgvadhU manoharau tu pUrvavat.h
sudhAMshu-bimba-pUruShastu rudra-saMj~NakaH shive .
hiraNmayo.antarikshajAta IshvaraH sadAshivaH
sadevavastu kA~nchanA~Ngi! pa~ncamUrti-vAdinAm .. 23

prabhoH pramA.aditastataH pramAvatI svayaM pR^ithag.h
vihAya sA sharIriNi prabhau tato hiraNmaye
hiraNmayA~NganAkR^itirnabho.antare cha bhAskare
tathA.antareShu dehinAM maheshvarI jayatyumA .. 24

madIyamambikAkhilasya viShTapasya duShTadhI
dhaviShTha pAdapa~NkajA dhunotu kaShTajAlakam .
ime cha komalaiH padairamUlya-talpashAlina-
stadIya ma~Ncha-rUpatAM bhajantu pa~NchachAmarAH .. 25