सप्थम शतके - द्वितीय स्तबकः षड्विंश स्तबकः आगमविन्मति कैरविणीनाम् बोधमजस्रमसौ विदधानः | पातु महेशवधू-वदनांशो हास-शशी-सकलानि कुलानि || १ आयत-लोचन-चुम्बित-कर्णा दान-यशोजित तोयद-कर्णा | शोणनगेश-मनःप्रिय-वर्णा नाशयताज्जगदार्तिमपर्णा || २ वेदतुरङ्ग विलोचन भाग्यं वेद शिरोनिचयैरपिमृग्यम् | शोक-विदारि सुधा-किरणास्यम् शोणगिरौ समलोकि रहस्यम् || ३ मुञ्च समस्त मनोरथ-लाभे संशयमद्य करामलकाभे | दृक्पथमाप नगेन्द्र-तनूजा सोऽहमितःपरमन्तरराजा || ४ शिल्पविदः प्रतिमां प्रविशन्ती स्वल्पविदां तरणाय चकास्ति | शोणधराभृति सम्प्रति लब्धा हन्त! चिरादियमेव ममाम्बा || ५ भारत-भूवलयेऽत्र विशाले सन्त्वनघानि बहूनिगृहाणि | आस्यविगीत सुधाकर-बिंबा शोणगिरौ रमतेऽत्र मदम्बा || ६ वारित-संश्रितपातक-जाला वारिधिवीचि निरङ्कुश-लीला | वारिज-पत्र विडम्बन नेत्रा वारणराजमुखेन सपुत्रा || ७ आयत-वक्रघनासित-केशी तोयज-बाण-रिपोर्हृदयेशी | काश सुमाच्छयशाः परमैषा पाशभिदस्तु तवेन्दु-विभूषा || ८ पङ्कज संभव पूजितपादा पङ्क विनाशन पावननामा | किङ्कर कल्पलता परमेयं शङ्कर नेत्रसुधा शरणं नः || ९ चञ्चल दृग्विनतामरवल्ली पञ्च पृषत्क-शरासन झिल्ली | काञ्चनगर्भ-मुख-प्रणुतेयं पञ्चमुख प्रमदा शरणं नः || १० अम्ब विधूय भटान्मदनादीन् नूपुरनाद-बिभीषिकयैषः | हन्त! जहार बलेन मनो मे शोणनगाङ्घ्रि निवेशिनि तेऽङ्घ्रिः || ११ कर्णपुटे कुरु मुग्ध ममोक्तिं मुञ्च धनादिषु मानस-सक्तिम् | शोणगिरीन्द्रवधू-पदभक्तिं शीलयशीलयुयास्यसि मुक्तिम् || १२ जीर्णतरे जरयाखिल देहे बुद्धिबलञ्च विलुम्पति मोहे | हन्त! सवित्रि तपन्मतिरन्ते सेवितुमिच्छति ना चरणं ते || १३ तन्त्रविदो नवयोनि तु चक्रं शोणधराधररुपमुशन्ति | अर्थममुष्य वपुर्मदनारे- रर्धमगेन्द्रसुते तवगात्रम् || १४ अस्तु नगेश्वरनन्दिनि लिङ्गं तैजसमेतदिहापि तवांशः | वीतगुणस्य विना तव योगं देवि! शिवस्य कुतः खलु तेजः? || १५ स्थापितमूर्तिरियं तव नम्या पुजयितुं जगदीश्वरि! रम्या | शोणनगार्धमिदं तव रूपं कीर्तयितं नगजे धुत-पापम् || १६ शोणनगार्धतनोऽनिशमङ्के धारयसेऽयि! गुहं रमणाख्यम् | आगतमप्ययि हा! मुहुरम्बो च्चाटयसे गणपं ननु कस्मात्? || १७ अङ्कजुषे रमणाय नु दातुं मानववेष-धराय गुहाय | शोणनगार्धतनो बहुदुग्धं मातर-पीतकुचेह विभाति || १८ पूर्णसमाधिवशात् स्वपिषि त्वं पीतमपीतकुचेऽम्ब! न वेत्सि | अङ्कजुषा रमणेन सुतेन प्रेक्ष्य यथेष्टमुरोरुह-दुग्धम् || १९ ज्ञान रसाह्वयमम्ब निपीय स्तन्यमसौ रमणो मुनिराट् ते | ज्ञानमयोऽभवदीश्वरि सर्वः पुष्यति येन तनुं हि तदात्मा || २० प्रीतिपदाय पयोधरकुम्भात् पार्वति! धीमय-दुग्धमपीतात् | अस्तु गुहाय शिवे! बहु दत्तं किंचिदिवेश्वरि! धारय मह्यम् || २१ प्रौढमिमं यदि वेत्सि तनूजं शैलसुते मदवारि दधानम् | मास्तु पयो-वितरानघमन्नं येन दधानि महेश्वरि शक्तिम् || २२ स्वार्जितमेव मया यदि भोज्यं सम्मद एव ममाखिल-मातः | आशिषमग्र्यतमामयि! दत्त्वा प्रेषय यानि जयानि धरित्रीम् || २३ विद्युति विद्युति वीक्ष्य विलासा वीक्षित-कर्मणि लक्ष्यरहस्या | पार्वण-चन्द्रमुखी ललिताङ्गी तैजसलिङ्ग-सखी शरणं नः || २४ मातरपीतकुचेऽरुण शैला- धीश्वर-भामिनि भामहनीये | साधु विधाय समर्पयते ते दोधक-माल्यमिदं गणनाथः || २५ || इति उमासहस्रे षड्विंश स्तबकः ||